Iluartut ulluat

Sunaava Iluartut ulluat?

Ilagiinni Iluartut ulluat immikkut ittumik atuaffigineqartarpoq, piffiit apeqqutaallutik atuarneqartarpoq ullormi 01. November imalt. sapaammi tulliuttumi malitsigisaani.

Iluartut ulluat katuulliniit aallaaveqarpoq, ukioq 800-kkunni missaanni atugaalersimalluni. Ullormi tassani kristumiut iluartuutitat oqaluffiup oqaluttuarisanerani malunnaateqqarsimasut (helgener) aamma upperisartik pillugu toqukkut naalliutsitaanermikkulluunniit nalunaajaasut (matyrer) eqqaaniarneqartarsimapput. Taamani kristumiut iluartuutitat ulluni aaliangersimasuni ulloqartinneqartarsimapput sulilu katuullini tamanna periuseq atuulluni, immikkulli ulloqanngitsut ullormi tassani eqqaaniarneqartarsimapput.

Iluarsaqqinnerup nalaani (Reformationen – Luther mv.) nutarterigaluarmata ileqqoq taanna katanneqarsimanngilaq atatiinnarneqarsimalunilu. Norgemi Danmarkimilu ukioq 1770 missani nalliuttut ulluinik aaqqissuusseqqinnermi inissinneqarpoq Iluartut Ulluat 1.november pisartunngorlugu tassa sapaatit tamaasa.

Suli maannamut katuullit ulloq 1.november Iluartut Ullorsiortarput.

1.november sioqqullugu unnukkut tassa 31.oktober Iluartut ulluata unnukkuutaa Amerikarmiut nalliussisarpaat mitaarfigisarpat Halloween - erlutik.

Ukiuni kingullerni Ilagiit lutherikkuusuni ulloq taanna ilaanni suli atorneqartarpoq, naalagiaqatigiilluni imaluunniit naneruutinik ilivermi ikitsiartorluni asasat peerusimasut eqqaaniarlugit.

Sumiiffiit ilaanni tamanna nalliussisarpaat asasat toqukkut qimagutereersimasut eqqaaniarlugit nipaallisimaqatigiittarlutik imaluunniit tussiaqatigiillutik. Imaanngitsoq ukioq mannaannaq toqusut pillugit, kisiannili nammineq uummatimi pigisat qujassutissagalugit Guutimut malunnartinniarlugit, ullumilu inuunerput tunissutaasoq qujassutigerusuttaratsigu.

Atuagassaq: Matthæusevangeliet 5, 1-12