Advent søndage

Nunatsinni adventisiortarneq

Meeraallungali sapaassuaq advent, siulleq ornikkiartornerani assut qilanaarnermik imaqarluartartoq eqqaamaqqissaarpara.

Ukiorsuummi taarseruttorfiani qilanaartuutingalugu ornitaq takorluuinermik imaqarluartartoq nuannersumik eqqaamasaqarfingaara.

Sapaammi ullaakkut iterluni ikitassaqarluni nalunagu, arfininngornerup unnuani innarneq ila sininneq ajulernermik imaqarluinnartarpoq, qangali iternissaq qilanaarnannguarsi!

Qatanngutigiit pingasuusuni sapaammi ullaakkut siulliuniunneq igalaani ulloriaq kusanarluinnartumik nivigasoq ikinnissaa pilerinartaqingami tummeqqakkut ammut arpaliuuttaqaagut, ikitseqqaartorlu nuannaartaraaq!

Ullaakkut ilaqutariittut naalagiaqatigiinneq ingerlattarparput, eqqaamalluarparalu oqaluffik inoqarluartaqisoq, tussiutillu tusarnerluinnartut tipaatsunnermik imallit kingumut tussiaqqilerlugit ila nuannertaqingami. Inuit assuarlutik, kiinaanni pilluarnermik tunisisut tussiartarnerat ersaarilluinnartumik toqqissinermik tunisisaraat.

Ullup ingerlanerani ilaquttanut isillattaaneq ingerlanneqartartoq kalaalerpassuarnik maluginiarsimavara, illoqarfinnilu tamani orpiup ikinneqartarnera ataatsimoortitsisartoq ilisimaarilluinnarparput. Issersuup ataani tarrajuttumi, orpik unngullugu kialaanernermik tamanut tunisisaraaq! Nissiaqqat nasaannik nasallit, pilluaqqusisut, eqitaartut ornitamut nuannersumut qilanaarnerat kiinaanni takussaasarput, meerannguillumi juulimaamut ersiuuttut, alutorsartut atuerusuttullu inequnaaluttaqalutik. Taassuma kingorna puussiaaqqamik tunisilluni sunaana meeraalluni taama nuannertigisoq, imarisaasa takunissaat qangali qilanaarnannguarsi, angerlaraanniliuna nererujooraanni.

Adventip sapaataa kalaalerpassuarnut kialaarnermik tunisisartoq ilimagilluinnarpara, naak immaqa ilaquttanut qimagussimasunut maqaasineq eqqaamanninnerlu sikkilertortaraluartoq. Ulloriarli igalaaniittartoq kunngit pingasut tungaanut, tamatsinnut kialaarnermik tunisisarput. Qangaliuna peerneqaraangami illut ilui silataaniit nillataannguarsi.

Kalaallinut adventi ataatsimoortitsisartoq, nuannaarnermik qilanaarnermillu tunisisartoq qanortoq tamatta ulloq nalliuppat nuannaarutigingaaritigu.