Ajoqinngorit

Nunarput tamakkerlugu Kalaallit Nunaanni Ilagiit iluanni ajoqit ulluinnarni amerlasoorpassuarnik, pissanganartunik inuiaqatigiinnullu pingaarutilinnik suliaqartarput. Ajoqitut ilaatigut kuisinerit, ilisinerit, naalagiartitsinerit, ilagiinnut tunngasunik suliniutit kiisalu tarnikkut aliasuutilinnik kiffartuussinerit suliarisassavatit – nalinginnaasumillu ilagiit ulluni nuannersuni artorsarfiusunilu malittarissallugit.

Ilinniagaq ajoqitut tassaavoq kursusitut ilusilerlugu ukiut pingasut ilinniagaq, pingasoriarlunilu najuulluni modulikkaanik ilinniarneq, tamarmik qaammammik ataatsimik sivisussusillit akornatigullu angerlarsimaffimmi ilinniagassanik ingerlataqartoqassaaq, atuagassanik aammalu suliassat allattariarsornikkut akisassat ingerlanneqassapput, aammalu najukkami oqaluffimmi sungiusartoqartassalluni.

Ilinniagaq ilinniagaqarnersiutitaqanngilaq kisiannili ullormusiaqartitsisoqassaaq aammalu sulinermi annaasaqaatit akilerneqassallutik najuulluni ilinniarnermi Biskoppip kaajallaasitaa nr. 3 10. april 2011-imeersoq malillugu ullormusiat, akilersimasanut taartisiat aammalu sulinermi aningaasanut annaasaqaatit taartisiat ajoqimut aammalu organistimut ilinniartunut tamanut.

Ilinniagaq tunngavimmigut kalaallisut ingerlanneqassaaq (allattariarsornermi aammalu atuarnermi). Killilimmik qallunaatut ilinniartitsineq toqqaannartumik kalaallisut nutserneqartassaaq.

Piumasaqaatit nalinginnaasut: 18-inik ukioqalereersimassaatit, meeqqanik innarliisimannginnermik aammalu pinerlussimannginnermik uppernarsaat uppernarsarneqassapput, oqaasilerillaqqissuusariaqarpoq kalaallisut allattariarsornermi aammalu oqaluttariarsornermi aammalu ilagiinnut evangelisk-lutherikkuusunut ilaasortaasariaqarluni.

Qinnuteqarsinnaaneq

6. februar 2017 mail-ikkut ajoqi@ilagiit.gl imalt. allakkatigut uunga: Biskoppeqarfik, Box 90, 3900 Nuuk (nalunaaqutserlugu ”Ajoqi”).

Paasissutissat allat

Paasissutissat allat: Qinnuteqaat immersugassaq aammalu ilinniarup aaqqissuussaanera www.ilagiit.gl atorlugu takuneqarsinnaapput. Apeqqutit ilinniarnermut tunngasut +299 32 11 34-imut saaffiginninnikkut apeqqutigineqarsinnapput imalt. ajoqi@ilagiit.gl atorlugu.

Tunngaviusumik pattattutut pikkorissarneq/organistimut atuarnissamut (oqaluffimmi nipilersortartutut) ilinniarneq

Organistimut/Oqaluffimmi nipilersortartutut ilinniarneq marlunnik immikkoortoqarpoq, tassa organistitut tunngaviusumik ilinniarneq aammalu organistitut/oqaluffimmi nipilersortartutut ilinniarneq. Taakku pillugit paasisaqarsinnaavutit qulequttami ILINNIAKKAT iluani pattattunngorniarneq toqqarlugu.

Sulisut pikkorissarneqartarnerat

Qulequtaq qulaani Ilinniakkat toorukku, ilinniakkat ataasiakkat pillugit paasisaqarsinnaavutit.